Лукашэнка пра каранавірус: «Хварэць мы будзем. Толькі пажадана, каб не было лавінападобнага скачка»
Пра гэта кіраўнік Беларусі заявіў, заслухоўваючы даклад аб гатоўнасці сістэмы аховы здароўя процідзейнічаць пагрозам распаўсюджвання каранавіруса, піша БелТА.
«Мы павінны змагацца за кожнага чалавека, асабліва калі гаворка ідзе пра старых. І калі мы хочам, каб потым нашы дзеці нас абаранялі і змагаліся за наша жыццё, мы павінны змагацца за жыццё кожнага старога, бо, на жаль, гэты вірус б'е перш за ўсё па старых і па тых, хто слаба абаронены імуннай сістэмай», — звярнуў увагу Аляксандр Лукашэнка.
Кіраўнік дзяржавы канстатаваў, што захворванне каранавірусам у краіне не зніжаецца, але, з іншага боку, няма і лавінападобнага нарастання. «Хварэць мы будзем. Толькі пажадана, каб не было лавінападобнага скачка па захворванні, каб гэтая лінія прайшла як мага бліжэй да гарызанталі. Пакуль сістэма аховы здароўя з гэтым спраўляецца», — заявіў ён.
