Кіраўнік Крычаўскага раёна прапрацаваў ўсяго 3,5 месяца — і яго адхілілі ад пасады
Ад пасады старшыні Крычаўскага райвыканкама адхілены Сяргей Шацкі. Інфармацыю TUT.BY пацвердзілі ў Магілёўскім аблвыканкаме. На гэтым месцы Шацкі прапрацаваў 3,5 месяца. Прычыну адхілення не называюць.
Фота: horki.info
У аблвыканкаме падкрэслілі: Шацкі ад пасады адхілены, але не вызвалены. Прычыну адхілення не называюць.
Абавязкі старшыні Крычаўскага райвыканкама часова выконвае намеснік — начальнік упраўлення па сельскай гаспадарцы і харчаванні Ігар Мяцеліца. Паводле яго слоў, новыя абавязкі ён выконвае з 2 красавіка, пасля таго як губернатар Леанід Заяц адхіліў Шацкага ад пасады.
Сяргей Шацкі стаў кіраўніком Крычаўскага райвыканкама ў канцы снежня 2019 года. За 2 месяцы да гэтага яго прадстаўлялі ў Дрыбінскім райвыканкаме як новага першага намесніка старшыні. Гэта значыць, за паўгода ён змяніў два месцы працы.
Шацкі родам з вёскі Высокае Аршанскага раёна, яму 39 гадоў. Скончыў Беларускую дзяржаўную сельгасакадэмію. Быў інжынерам-рыбаводам у Сенненскім раёне, потым некалькі гадоў працаваў на лесапільным участку ў Аршанскім раёне. З 2011 года 7 гадоў быў першым намеснікам ва ўпраўленні сельскай гаспадаркі і харчавання Аршанскага райвыканкама. Вясной 2018-га быў прызначаны першым намеснікам старшыні Горацкага райвыканкама (начальнікам упраўлення па сельскай гаспадарцы і харчаванні), дзе правёў роўна паўтара года. А ў кастрычніку 2019-га быў прадстаўлены на такую ж пасаду ў Дрыбінскім райвыканкаме, дзе прапрацаваў не больш за два месяцы да прызначэння кіраўніком Крычаўскага раёна.