Пад Чашнікамі школьнікі 2-га і 3-га класаў спалілі стайню
Стайня згарэла ў вёсцы Капцевічы каля Чашнікаў 5 красавіка, у пажары міліцыя абвінавачвае мясцовых школьнікаў — вучняў пачатковых класаў, паведамляюць Народныя навіны Віцебска.
Калгасны вартаўнік заўважыў мясцовых дзетак — вучняў другога і трэцяга класа. У дзяцей канікулы, і яны ўтрох гулялі па вёсцы. Калі школьнікі пайшлі на ферму, вартаўнік іх прагнаў.
Аднак, абышоўшы будынак з другога боку, яны забраліся ў стайню праз акно. Надвор'е стаяла ветранае, таму хлапчукі, як яны распавялі міліцыянтам, вырашылі пагрэцца. У аднаго са школьнікаў знайшліся запалкі, і дзеці падпалілі салому. Абагрэўшыся, хлопцы затапталі вогнішча і пайшлі дадому.
Ужо падыходзячы да дамоў, яны заўважылі, што ад будынка стайні валіць дым. Калі на выручку падаспелі пажарныя, дах будынка гарэў адкрытым полымем.
У выніку пажару ў будынку стайні знішчаны дах, загоны, закураны сцены. Коні не пацярпелі, іх ужо выгналі ў поле. Ацалелі і суседнія пабудовы.