Меркаванне: чаму каранцін сёння можа даць адваротны эфект і што можа яго замяніць
Чаму ўводзіць каранцін на тэрыторыі Рэспублікі Беларусь на гэты момант шкодна, і калі яго ўводзіць? Свае прапановы даслаў у «Нашу Ніву» чытач з Мінска ВН.
Дадзена:
* Тэарэтычна COVID-19 перахварэюць мінімум усе, максімум усе, прычым некаторыя па некалькі разоў.
* Захворванне вялікай колькасці людзей адначасова прыводзіць сістэмы аховы здароўя да перагрузкі.
* Перагрузка сістэмы аховы здароўя прыводзіць да вялікай колькасці смерцяў.
Што ў нас ёсць:
* Краіна з насельніцтвам у 9,5 мільёна чалавек.
* Сталіца з насельніцтвам у 2 мільёны чалавек, у якую ўся астатняя краіна да пандэміі ехала.
* Ачагі ў сталіцы і некаторых абласных цэнтрах, адзінкавыя выпадкі ў вёсцы.
Разгледзім сталіцу
Пры аб'яўленні каранціну прыкладна чвэрць насельніцтва сталіцы проста з яе з'едзе.
* З'едуць маладыя прыезджыя, якія здымалі кватэру і працавалі — часцяком на невысокаапплатнай і кантактнай працы (прадаўцы, менеджары, аператары кол-цэнтраў, афіцыянты). Такія людзі, фактычна, страцяць працу. Усе гэтыя людзі патэнцыйныя ціхія носьбіты віруса. Паедуць у родныя сёлы (дзе шмат старых), аграгарадкі, і маленькія гарады. Часцяком гэтыя сёлы і гарады не маюць інфекцыйных аддзяленняў бальніц — значыць людзей прыйдзецца дастаўляць у сталіцу, буйныя гарады.
Акрамя гэтага, колькасць кантактаў такіх людзей пры вяртанні можа як пераўзыходзіць звычайную паўсядзённую для іх, што яшчэ больш пагоршыць сітуацыю (О, Колька з Мінска прыехаў, давай вып'ем, успомнім маладосць), так і наадварот. Акрамя гэтага, магчыма пагаршэнне крымінагеннай абстаноўкі як у адносінах да такіх прыезджых (чаго ты сюды заразны прыехаў), так і з боку такіх прыезджых (з-за алкаголю).
* Даволі забяспечаныя людзі, якія маюць загарадныя дамы, лецішчы, што дазваляюць знаходзіцца на іх цэлы год, каб адпачыць ад усяго гэтага. Часцяком такія людзі таксама актыўныя і кантактныя ў звычайным жыцці і могуць быць незаўважнымі разносчыкамі віруса. Пры пагаршэнні самаадчуваення могуць самі саманадзейна паехаць у лякарню, чым могуць выклікаць ДТЗ.
Усяго прыкладна 500 тысяч насельніцтва пачне разносіць вірус па ўсёй краіне, за адзін раз, тады як цяпер ён лакалізаваны ў абласных цэнтрах і сталіцы. Што прывядзе да аднамомантавага ўсплёску па ўсёй краіне. І тут ужо банальна не будзе хапаць машын хуткіх, якія будуць вывозіць адусюль людзей, якім стане значна горш. Акрамя гэтага існуе верагоднасць заражэння замкнёных прастор людзей, якія працуюць у с/г.
А нават калі хуткіх хопіць, выбухны рост захворвання ўсё роўна дасць рост смерцяў.
Сцэнар сталіцы можна ўжыць і да абласных цэнтраў з каэфіцыентам у долю насельніцтва ў адносінах да сталіцы.
Што рабіць у дадзенай сітуацыі:
* Калі ў вас ёсць магчымасць працаваць з хаты — працуйце з хаты.
* Выконвайце правілы гігіены.
* Калі ёсць магчымасць, дапамагайце рублём або валанцёрствам у twiby, і на краўдфандынгавых пляцоўках.
* Маладыя прыезджыя ў сталіцу людзі, паспрабуйце не наведваць сваіх састарэлых родных у рэгіёнах.
* Своечасова звяртайцеся да доктара.
Што рабіць уладам:
* Працягваць палітыку ізаляцыі кантактаў і астатнія мерапрыемствы.
* Перыядычна інфармаваць насельніцтва праўдзівай інфармацыяй, а не злівамі ў тэлеграм-каналах.
* Уводзіць лакальныя каранцінныя мерапрыемствы пры неабходнасці.
* Дапамагчы бізнэсу — калі людзі страцяць працу — яны хутчэй разнясуць заразу.
