«Не разумею, як яго маглі выпісаць з тэмпературай…» У Віцебску памёр 70-гадовы вайсковы пенсіянер з каранавірусам
Ноччу 2 красавіка ў Віцебскім абласным клінічным спецыялізаваным цэнтры памёр вайсковы пенсіянер Уладзімір Сідараў, яму было 70 гадоў, паведаміў Tut.by сын нябожчыка Андрэй.
3 сакавіка мужчына паступіў у аддзяленне хірургіі з дыягназам «трамбоз падкаленнага сасуда», праз пяць дзён яго выпісалі дадому з тэмпературай 38. Сказалі, што грып трэба лячыць дома. Але стан мужчыны пагаршаўся, праз два дні яму зрабілі рэнтген у паліклініцы — і адтуль з двухбаковай пнеўманіяй забралі ў тую ж бальніцу. Пяць дзён пацыент быў у рэанімацыі на штучнай вентыляцыі лёгкіх, але выратаваць яго не ўдалося. У мужчыны быў станоўчы тэст на каранавірус. COVID-19 пацвердзіўся і ў яго жонкі, зараз яна ў інфекцыйнай бальніцы з пнеўманіяй.
Андрэй Сідараў распавядае, што бацька да таго, як трапіць у хірургічнае аддзяленне, амаль два тыдні не выходзіў з хаты: калена так балела, што ён ледзь мог хадзіць.
— У шпіталі яму паставілі дыягназ «трамбоз падкаленнага сасуда». Пяць дзён пракапалі, пралячылі — і 19 сакавіка выпісалі, — кажа Андрэй. — Нягледзячы на тое што ў яго была высокая тэмпература — 38. Сказалі, што гэта грып, што ён павінен звярнуцца ў паліклініку па месцы жыхарства.
Родныя ўспамінаюць, што дома мужчыну станавілася ўсё горш: тэмпература падымалася, з'явіўся кашаль. Жонка пенсіянера ўспамінае, што спачатку выклікалі лекара на дом.
— Лекар паслухала яго, сказала, што лёгкія чыстыя, хрыпаў няма — і прызначыла другі антыбіётык, — кажа Таццяна Барысаўна. — Але тэмпература была ўжо 39, не збівалася, муж пачаў задыхацца. Выклікалі яшчэ раз лекара: сказала, што ў яго хрыпы, хутчэй за ўсё, запаленне лёгкіх. У паліклініцы зрабілі рэнтген — двухбаковая пнеўманія. І забралі на хуткай ў тую ж бальніцу, дзе ён ляжаў, але ў кардыялагічнае аддзяленне.
Жонка кажа, што, паколькі стан мужа пагаршаўся, яго змясцілі ў рэанімацыю, пяць дзён ён быў на штучнай вентыляцыі лёгкіх, ноччу 2 красавіка мужчына памёр.
— Тэст на каранавірус у мужа быў станоўчы, — кажа Таццяна Барысаўна. — Але мы не адразу пра гэта даведаліся. Калі яго забрала хуткая, да мяне дадому прыйшла дачка з сям'ёй, падтрымаць. Гадзіны паўтары яны прабылі. Потым каранавірус пацвердзіўся і ў мяне, ляжу ў інфекцыйнай бальніцы з запаленнем лёгкіх. Дачка, яе муж і дзеці таксама пад наглядам лекараў. У дачкі і ўнучкі тэст на каранавірус адмоўны, зяць і ўнук чакаюць выніку. Са мной у палаце ляжыць жанчына, муж якой таксама быў спачатку ў бальніцы, потым яго выпісалі дадому, а адтуль ужо забралі з каранавірусам — ён у рэанімацыі на ШВЛ. Як мог заразіцца мой муж? У нас версія адна — у бальніцы.
— Я ў інфекцыйнай бальніцы, — распавядае Tut.by Ірына, дачка памерлага Уладзіміра Сідарава. — У мяне адмоўны тэст на каранавірус, але рэнтген паказаў пнеўманію, у дачкі — бранхіт. Муж і сын пакуль не ведаюць свой вынік. Хоць я ў адной лякарні з мамай, сустракацца мы не можам, выхад з палаты забаронены.
Паколькі ўся сям'я ў Віцебску ў бальніцы, развітацца з памерлым дзедам, бацькам і мужам яны не змогуць.
Арганізацыяй пахавання займаецца сын Андрэй, які прыехаў з Мінска.
— У нас версія адна: бацька заразіўся ў бальніцы, — кажа мужчына. — За мяжой ён не быў, гасцей замежных у бацькоў таксама не было. Ён амаль не мог хадзіць і не выходзіў, пакуль не трапіў у хірургію.
Андрэй задаваў гэтае пытанне ў бальніцы. Там яму патлумачылі, што на 19 сакавіка сітуацыя і ў Віцебску, і ў цэлым па Беларусі была спакойная, ніхто не западозрыў у пацыента, які не выязджаў за мяжу i не кантактаваў з людзьмі з-за мяжы, каранавірус. Сімптомы прынялі за грып, і, каб пацыент не заразіў іншых хворых, з хірургіі яго адправілі лячыцца дадому. Тым больш у Віцебскім абласным клінічным спецыялізаваным цэнтры няма інфекцыйнага аддзялення, а менавіта ў такія дастаўлялі першых пацыентаў з каранавірусам. Літаральна праз тыдзень гэтую бальніцу пераарыентавалі на прыём хворых з падазрэннем і з пацверджаным каранавірусам, менавіта таму Уладзімір Сідараў апынуўся ў кардыялагічным аддзяленні.
— У бальніцы кажуць, што, наадварот, лічаць, што крыніцай заражэння стаў мой бацька, — тлумачыць Андрэй Сідараў. — Але цяпер гэта ўсё на ўзроўні здагадак. Ужо ніхто дакладна не можа высветліць, з каго ўсё гэта пачалося.
У пасведчанні аб смерці Уладзіміра Сідарава — фота ёсць у рэдакцыі — пазначана: вострая рэспіраторная недастатковасць, вірусная пнеўманія (COVID-19), асноўная прычына смерці — каранавірус.
