Лукашэнка: Даляр паступова абясцэньваецца
У інтэрв'ю тэлекампаніі «Мір» Аляксандр Лукашэнка ацаніў тое, якім будзе свет пасля пандэміі, паведамляе тэлеграм-канал «Пул першага».
«Сёння ўсе ўжо адказваюць: пасля пандэміі свет будзе іншым. І я з гэтым згодны. Але дзе будзе наша месца ў гэтым свеце? Вось для мяне галоўнае пытанне. Гэта не каранапсіхоз, не інфапандэмія. Гэта ёсць, але месяц-два — і пройдзе. Застанецца пытанне, дзе наша месца. І такое пытанне будзе і для багатых рэсурсамі Казахстана, Туркменістана, Таджыкістана, яшчэ больш для Арменіі і Кыргызстана, Украіны і для Наўседы [прэзідэнт Літвы], які сёння спрабуе паставіць пад сумнеў палітыку прэзідэнта Беларусі. Для ўсіх паўстане гэтае пытанне. Баюся, каб нас не перадзялілі без вайны», — сказаў Лукашэнка.
Таксама кіраўнік краіны распавёў пра тое, каму і навошта цікавы перадзел свету. І для чаго ААН прапануе ўключыць друкарскі станок!
«Даляр і так паступова абясцэньваецца, а тут проста пойдзе вал, інфляцыя. Дзе апынемся мы са сваім рублём, зразумела. Больш за тое: хто атрымае гэтыя трыльёны, у каго яны застануцца? Ці не атрымаецца, што багатыя стануць багацейшымі, а бедныя — бяднейшымі? Атрымаецца. Нас штурхнулі да таго, што мы павінны спыніцца, сядзець і праесці тыя бедныя валютныя запасы, якія ў нас ёсць. Нельга сказаць, што нават у Расіі яны велізарныя. Гэта для Расіі нішто — седзячы, на год не хопіць. Сапраўды гэтак і ў нас. І тады, надрукаваўшы 10% ВУП, да нас прыйдуць тыя, хто на нагах, і скажуць: вось вам пакрысе, але вы будзеце рабіць тое, што мы скажам. Вось так можа быць перадзяліць свет».
***
У Беларусі за тры месяцы з 1 студзеня курс даляра вырас з 2,1085 да 2,5893 беларускага рубля, г. зн. на 48 капеек, або 22,5%.