Першы інфіцыраваны на Брэстчыне адмаўляўся ехаць у бальніцу — яго шпіталізавалі з дапамогай міліцыі
Учора стала вядома, што першы выпадак каранавіруса зафіксавалі ў Брэсцкай вобласці. Сёння высветлілася, што гэта жыхар Столінскага раёна, паведамляюць «Навіны Палесся».
Двух жыхароў раёна даставілі 31 сакавіка ў інфекцыйнае аддзяленне Брэсцкай абласной бальніцы. Яны кантактавалі з жанчынай, якая прыехала з іншай вобласці і аказалаася носьбітам каранавіруса. Аналіз пацвердзіў наяўнасць COVID-19 у аднаго з абследаваных.
Прычым, як зазначае выданне, пацыенты праявілі вялікую безадказнасць і наадрэз адмаўляліся ехаць у абласную бальніцу па добрай волі. Прыйшлося паступіць у адпаведнасці з законам — з ужываннем пракурорскіх санкцый. Таму іх шпіталізавалі з дапамогай супрацоўнікаў міліцыі.
Галоўны ўрач Столінскай ЦРБ Віктар Майсюк звярнуўся да жыхароў раёна з просьбай безумоўнага выканання правілаў асабістай гігіены і адказнасці перад іншымі грамадзянамі:
«Часта мыць рукі, выкарыстоўваць антысептыкі, максімальна скараціць візіты ў крамы і паліклінікі. Асабліва людзям, старэйшым за 60 гадоў, і ўсім, хто мае хранічныя захворванні! Ну і, зразумела, не адмаўляцца ад шпіталізацыі, калі яе прапануюць. Гэта багата сур'ёзнымі наступствамі. Каранавірус падобны да снежнага камяку: у кожнага хворага — дзясяткі кантактаў!»
