Беларускія дэпутаты ратыфікавалі візавае пагадненне з ЕС
Палата прадстаўнікоў Беларусі ратыфікавала сёння пагадненне з ЕС аб спрашчэнні выдачы віз, перадае БелТА.
Візавае пагадненне прадугледжвае ўзаемнае палягчэнне працэдур для шырокай катэгорыі грамадзян і зніжэнне збору.
Кошт «шэнгена» для беларусаў знізіцца да 35 еўра, а рашэнне аб выдачы візы будзе прымацца ў тэрмін да 10 дзён (у выпадку дадатковай праверкі тэрмін можа павялічыцца да 30 дзён). Шмат якія катэгорыі грамадзян у залежнасці ад мэты паездкі змогуць звяртацца па візу без выплаты збору і атрымліваць шматразовыя візы з больш доўгім тэрмінам дзеяння ў спрошчаным парадку. Беларуская віза для грамадзян ЕС таксама патаннее да 35 еўра. Акрамя таго, будзе павялічаны пералік падстаў для выдачы бясплатных віз у некамерцыйных мэтах. Тэрмін знаходжання замежнікаў у Беларусі павялічыцца ў два разы: з 90 дзён у годзе (цяпер) да 180.
Дакументы пачнуць дзейнічаць у першы дзень другога месяца пасля даты паведамлення бакамі адзін аднаму аб завяршэнні працэдур ратыфікацыі. Мяркуецца, што візавае пагадненне ўступіць у сілу ў чэрвені.
