Палітыкі перавялі 3150 рублёў на анлайн-канцэрт «Годны Дзень Волі»
Раней гэтыя сродкі былі сабраныя праз краўндфандынгавыя пляцоўкі. Арганізатары мітынга-канцэрта БНР101 у Кіеўскім скверы, а таксама заяўнікі мітынга-канцэрта БНР100 каля Опернага тэатра ў Мінску пералічылі раней сабраныя сродкі для святкавання Дня Волі-2020 у Мінску блогерам. У аргкамітэце з палітычных арганізацый па святкаванні Дня Волі БНР102 вырашылі падтрымаць адзінае мерапрыемства, якое будзе адбывацца ва ўмовах эпідэміі каранавіруса ў Беларусі на 25 сакавіка.
У сувязі з тым, што папярэднюю заяўку на правядзенне мітынга-канцэрта ў Мінску на Дзень Волі-2020 адклікалі, а таксама адмянілі ўсе іншыя масавыя мерапрыемствы па святкаванні Дня Волі ў краіне, у аргкамітэце палічылі, што падтрымка анлайн-канцэрта «Годны Дзень Волі 2020» з’яўляецца аптымальнай.
Свята ў анлайн-фармаце пачнецца сёння а 18-й на сайце hodna.by.