У Італіі памёр 72-гадовы святар, які аддаў апарат вентыляцыі лёгкіх маладому пацыенту
У бальніцы італьянскага горада Лаверэ ў правінцыі Бергама ад каранавіруса памёр 72-гадовы святар Джузэпэ Берардэлі, які ахвяраваў свой апарат штучнай вентыляцыі лёгкіх незнаёмаму маладому пацыенту, піша Бі-бі-сі.
Джузэпэ Берардэлі быў настаяцелем царквы ў мястэчку Казніга. Яго прыхаджане ўспамінаюць, што нават пасля ўспышкі каранавіруса ён не перастаў аказваць дапамогу.
Тады парафія купіла яму апарат ШВЛ. Аднак, як распавялі ў бальніцы горада Справеры, патрапіўшы туды, Берардэлі адмовіўся ад яго на карысць маладога чалавека, які ляжаў у тым жа аддзяленні.
Жыхары Казніга апладзіравалі з вокнаў і з балконаў, калі труну з целам пастара везлі на гарадскія могілкі. Цырымоніі развітання і пахавання не было ў сувязі з дзеючай у Італіі забаронай на масавыя мерапрыемствы.
У краіне дзейнічаюць жорсткія правілы каранціну. Жыхары, не занятыя ў ключавых сферах, могуць пакідаць дамы толькі для таго, каб купіць прадукты і медыкаменты.
У аўторак Папа Рымскі Францішак адслужыў малебен па памерлых дактарах і святарах, якія, па словах пантыфіка, з'яўляюцца прыкладам гераізму ў служэнні хворым.
Прынамсі 50 святароў у Італіі сталі ахвярамі Covid-19.
