«Гэта кадэбэшныя фантазіі»: у БНФ і БХД пракаментавалі ўкід пра аб’яднанне партый
У тэлеграм-канале «Папаратар», блізкім да сілавых структур, паведамілі, што «прынятае рашэнне пра ўваходжанне БНФ у БХД».
Павел Севярынец і Рыгор Кастусёў. Фота Надзеі Бужан
«У прынцыпе рашэнне зразумелае: Народны фронт згубіў вялікую колькасць прыхільнікаў і мае фінансавыя праблемамы, у тым ліку з аплатай офіса. БХД ж, наадварот, на пад’ёме і працягвае прыцягваць сродкі з-за мяжы», — гаворыцца ў допісе.
Тым не менш, ананімны аўтар не ўлічвае таго, што Партыя БНФ мае дзяржаўную рэгістрацыю, а вось у БХД яе няма. Таму сам выраз пра ўваходжанне ў структуру БХД гучыць дастаткова непраўдападобна.
«НН» спытала лідараў Партыі БНФ і БХД, ці сапраўды іх структуры вырашылі аб’яднацца.
«Пра аб’яднанне нават размоваў не было. Мы сапраўды аб’ядноўваем нашы высілкі ў пытанні абароны незалежнасці. Наколькі я разумею, «Папаратар» — гэта такі праўладны рэсурс. Трэба аналізаваць, навошта яны імкнуцца абгадзіць БНФ. Значыць, нешта мы зрабілі правільна», — сказаў лідар БНФ Рыгор Кастусёў.
«Нейкія кадэбэшныя фантазіі, — эмацыйна рэагуе сустаршыня БХД Павел Севярынец. — Мы сапраўды ідэйна блізкія, разам працавалі падчас вылучэння адзінага кандыдата, але пра аб’яднанне гаворка не вядзецца. Гэта нейкае трызненне».
