«Нашы браты там сядзяць»: Лукашэнка даручыў дапамагчы расіянам вярнуцца з Польшчы на радзіму
Аляксандр Лукашэнка, заслухоўваючы даклад аб эпідэміялагічнай сітуацыі ў краіне, даручыў дапамагчы засеўшым у Польшчы расіянам вярнуцца на радзіму, перадае БЕЛТА.
Кіраўнік дзяржавы адзначыў, што краіны ў сувязі з распаўсюдам каранавіруса зачынілі свае межы, спрабуючы засцерагчыся ад ўвозу інфекцыі. На думку Лукашэнкі, такія рашэнні не пазбаўляюць ад праблемы і штучна ствараюць сітуацыю, калі чалавек не можа трапіць дадому.
«Вазьміце расіянаў, якія сёння ў Польшчы: яны не могуць выехаць у Расію. Калі ля нашых межаў сабралася пэўная колькасць расіянаў, Ігар Пятровіч, вам персанальнае даручэнне: прыцягвайце каго хочаце, але трэба вывезці расіянаў з Польшчы і дапамагчы ім дабрацца на радзіму», — звярнуўся Аляксандр Лукашэнка да кіраўніка Адміністрацыі прэзідэнта Ігара Сергяенкі.
«Гэта не справа, што нашы браты там сядзяць, зразумела, у якой сітуацыі. Трэба ім дапамагчы, як бы ў нас ні складваліся адносіны з расійскімі ўладамі. Людзі ні ў чым не вінаватыя», — падкрэсліў Лукашэнка.
Ён даручыў прыцягнуць да вырашэння гэтага пытання Міністэрства замежных спраў і праваахоўныя структуры. «Няхай дапамогуць расіянам пакінуць Польшчу. Вывезці іх на радзіму, калі расіяне (расійскія ўлады — БЕЛТА) не могуць там разабрацца», — дадаў кіраўнік дзяржавы.