Байдэн амаль пазбавіў Сандэрса шанцаў на перамогу ў гонцы дэмакратаў
Фота з інстаграма Джо Байдэна
Былы віцэ-прэзідэнт ЗША Джозэф Байдэн у аўторак атрымаў упэўненую перамогу на першасных выбарах (праймерыз) у трох амерыканскіх штатах. Ён значна павялічыў адрыў ад свайго, па сутнасці, адзінага суперніка ў перадвыбарнай барацьбе дэмакратаў — сенатара ад Вермонта Берні Сандэрса, піша ria.ru.
Праймерыз адбыліся ў Фларыдзе, Ілінойсе і Арызоне. На коне былі сумарна больш за 440 галасоў дэлегатаў, якія на нацыянальным з'ездзе дэмакратаў у Мілуокі ў ліпені падтрымаюць таго ці іншага прэтэндэнта на вылучэнне кандыдатам у прэзідэнты ад партыі. Апрацоўка бюлетэняў у гэтых штатах афіцыйна пакуль не завершаная, але вядучыя амерыканскія СМІ ўпэўненыя, што перамогу з немалай перавагай ва ўсіх трох выпадках атрымаў Байдэн.
Да выбараў у аўторак ён апярэджваў Сандэрса прыкладна на 150 галасоў. Цяпер яго перавага павялічылася амаль у два разы.
Паводле апошніх ацэнак газеты The New York Times, з улікам папярэдніх вынікаў галасавання ў аўторак у Байдэна 1147 галасоў, у Сандэрса — 861.
У сенатара ад Вермонта па-ранейшаму ёсць тэарэтычная магчымасць заручыцца падтрымкай 1991 дэлегата ад штатаў, што неабходна для вылучэння кандыдатам у прэзідэнты ад дэмакратаў, але для гэтага яму трэба атрымаць серыю буйных перамог на наступных праймерыз. Калі верыць апошнім апытанням грамадскай думкі ў ЗША, шанцаў на гэта вельмі мала.
The New York Times называе існуючы ў Байдэна адрыў па ліку галасоў дэлегатаў «амаль непераадольным» для Сандэрса.
