У Беларусі яшчэ тры выпадкі каранавіруса
У Беларусі яшчэ тры станоўчыя тэсты на каранавірус (COVID-19): у жыхароў Гомеля, Мінска і Гродна. Такім чынам колькасць выпадкаў каранавіруса ў краіне вырасла да 12 (трое ачунялі).
Як паведамляе Мінздароўя, у рамках актыўнага лабараторнага кантролю грамадзян у мінскім аэрапорце ў беларуса, што вярнуўся з Партугаліі, атрыманы станоўчы тэст на РНК каранавіруса COVID-19.
У РНПЦ эпідэміялогіі і мікрабіялогіі праводзіцца паглыблены паўторны лабараторны кантроль аналізаў гэтага чалавека. Ён шпіталізаваны ў Гомельскую абласную інфекцыйную клінічную бальніцу. На сённяшні момант стан яго здавальняючы. Праводзіцца актыўная шпіталізацыя пацыентаў першага ўзроўню (грамадзян, якія прыехалі разам з ім з-за мяжы, а таксама тых, хто быў побач з ім у самалёце). Улічваючы, што тэст праведзены пры ўездзе ў краіну, пагроза далейшага распаўсюджвання ацэньваецца як мінімальная.
«Моцныя Навіны» ўдакладнілі пра выпадак з Гомеля.
20-гадовы малады спартсмен вярнуўся з Партугаліі, дзе браў удзел у спаборніцтвах па спартыўнай акрабатыцы.
Каманда прыляцела ў Мінск, аднак на той момант сімптомаў захворвання ў спартсмена не было. Па вяртанні ў Гомель ён быў шпіталізаваны, у яго ўзялі тэст на каранавірус, які даў станоўчы вынік. Хлопец знаходзіцца ў ізаляцыі ў Гомельскай абласной інфекцыйнай бальніцы. Акрамя таго, пад назіранне ўзята больш за дзесяць чалавек «узроўню першага кантакту».
Як паведамляе Мінздароўя, удакладняючая дыягностыка праводзіцца ў аднаго з пацыентаў у Мінску, які прыбыў з Нямеччыны і ў момант праходжання мяжы схаваў факт знаходжання ў Паўночнай Італіі.
Мінздароўя яшчэ раз звяртаецца з просьбай да ўсіх грамадзян, якія вяртаюцца ў краіну, — абавязкова інфармаваць спецыялістаў, якія працуюць у зонах пагранічнага кантролю пра тое, што вы пабывалі ў эпідэмічна неспрыяльных раёнах. Акрамя таго, Міністэрства аховы здароўя заклікае ўсіх, хто вяртаецца з-за мяжы, — па магчымасці, першыя 14 дзён абмежаваць лік кантактаў. А ў выпадку з'яўлення рэспіраторнай інфекцыі выклікаць хуткую медыцынскую дапамогу. Абавязкова трэба сказаць па тэлефоне, якія краіны вы наведвалі.
Пазней стала вядома, што тэст на каранавірус даў станоўчы вынік у 62-гадовай жыхаркі Гродна, што вярнулася з Італіі. Яна шпіталізаваная.
На сёння ва ўстановах аховы здароўя Беларусі з дыягназам COVID-19 знаходзяцца 12 пацыентаў. Трое з іх рыхтуюцца да выпіскі. Ва ўсіх пацыентаў стан здавальняючы, тэмпературы і іншых клінічных праяў хваробы няма.
