На каранавірус захварэў першы прадстаўнік славутага каралеўскага роду
Каранавірус новага тыпу дыягнаставаны ў Карла Габсбурга-Латарынгскага — унука імператара Аўстра-Венгрыі Карла I (1916-1918), дзейнага кіраўніка дома Габсбургаў (адна з найбольш магутных манархавых дынастый, якая правіла ў многіх еўрапейскіх краінах з 1306-га па 1918 год). Пра гэта піша ТАСС са спасылкай на чэшскую газету Mlada fronta DNES.
Карл Габсбург-Латарынгскі, якому нядаўна споўнілася 59 гадоў, знаходзіцца на хатнім каранціне. Мяркуецца, што ён заразіўся ад аднаго са сваіх сяброў.
Фота з Вікіпедыі
«Некалькі дзён таму я адчуў сябе дрэнна. Былі прыкметы прастуды. Думаў, што гэта звычайны грып, але неўзабаве мне патэлефанаваў сябар і сказаў, што нядаўна быў на кангрэсе ў Швейцарыі і пасля гэтага ў яго быў дыягнаставаны каранавірус. Я таксама вырашыў здаць аналізы. Вынікі апынуліся станоўчымі», — сказаў Габсбург-Латарынгскі.
Ён праводзіць каранцін у віле каля горада Зальцбург. Ён настаяў, каб сям'я знаходзілася асобна ад яго.
«Каранцін — рэч вельмі прыкрая, але павінен сказаць, што я прыстасаваўся. Каранавірус, урэшце, не чума. Як доўга мне трэба будзе заставацца на каранціне, вызначаць дактары на аснове аналізаў», — адзначыў Карл Габсбург-Латарынгскі.
Карл Габсбург-Латарынгскі, згодна з газетай, стаў першым кіраўніком еўрапейскага манархічнага дома, які заразіўся каранавірусам.
