Пуцін вырашыў абнуліць свае тэрміны. Ён зможа быць прэзідэнтам да 2036 года
Уладзімір Пуцін пагадзіўся «абнуліць» свае прэзідэнцкія тэрміны, калі на гэта дасць дазвол Канстытуцыйны суд Расіі. Яго згода была аформлена «па просьбах грамадскасці».
Ініцыятыву праявіла дэпутатка-касманаўтка Валянціна Церашкова падчас пасяджэння Дзяржаўнай Думы Расіі. Яна прапанавала абнуліць прэзідэнцкія тэрміны Пуціна.
У адказ той тэрмінова прыехаў у Думу і зачытаў з паперкі сваю згоду.
«У доўгатэрміновай перспектыве грамадства павінна мець гарантыі, што рэгулярная змена ўлады будзе забяспечана. Лічу немэтазгодным прыбіраць абмежаванне па колькасці тэрмінаў», — адзначыў Пуцін.
«[Але] абнуленне тэрмінаў магчыма, калі Канстытуцыйны суд дасць афіцыйнае заключэнне, што гэтая папраўка не будзе супярэчыць асноўным пазіцыям Канстытуцыі», — сказаў Пуцін.
