Мінздароўя: У Беларусі 3 выпадкі каранавіруса, у каранціне знаходзіцца 271 чалавек
У каранціне ў сувязі з выпадкамі каранавіруса пад наглядам дактароў знаходзіцца 271 чалавек. Пра гэта паведамляе Мінздароўя на сваёй старонцы ў тэлеграм. Таксама ў ведамстве супакойваюць, што ўсім, хто знаходзіцца ў кантактных цэнтрах, выдадуць даведкі і лісткі непрацаздольнасці, з вучобай і працай цяжкасцяў не ўзнікне.
Агулам у Беларусі па стане на панядзелак, 2 сакавіка, зарэгістраваныя тры выпадкі каранавіруса. Аднак іх вынікі яшчэ адправяць у адну з лабараторый Сусветнай арганізацыі аховы здароўя, каб іх пацвердзіць.
Стан жыхаркі Віцебска, у якой выяўлены каранавірус, здавальняючы. У яе нармальная тэмпература, жанчына практычна здаровая.
Два пацыенты ў Мінску таксама пачуваюцца нармальна, у іх нават не было тэмпературы. «Мы кантралюем сітуацыю. У выпадку неабходнасці гатовыя аказаць дапамогу», — дадаў загадчык кафедры інфекцыйных хвароб Беларускага медуніверсітэта, прафесар Ігар Карпаў.
Меры эпідэміялагічнага нагляду будуць і далей выкананы, падкрэслілі на брыфінгу.
«Мы не ўводзім абмежавання на выезды — мы не рэкамендуем выезд у шэраг краін, ненадзейных з пункту гледжання санэпідабстаноўкі», — сказалі ў Мінздароўя.
Нагадаем, што 28 лютага стала вядома пра першы выпадак захворвання каранавірусам у Беларусі. 27 лютага тэсты паказалі наяўнасць віруса ў студэнта БНТУ з Ірана, які прыляцеў у Мінск рэйсам з Баку. Разам са студэнтам былі шпіталізаваны яго дзяўчына, яе бацькі і сястра.
У бацькі нявесты пазней адзін з тэстаў паказаў «сумніўны вынік».
А 1 сакавіка ў адным з тэстаў, які быў узяты ў жыхаркі Віцебска, працаўніцы холдынгу «Марка», што ездзіла на выставу ў Мілан, быў выяўлены фрагмент РНК, які можа належаць тыпу каранавіруса 2019-nCoV.
Для жыхароў Мінска адкрыта гарачая лінія па пытаннях каранавіруснай інфекцыі +375173343468.
