Пра пачатак эпідэміі каранавіруса абвясцілі ў Нямеччыне. Першы выпадак зафіксаваны ў Эстоніі
Міністр аховы здароўя Нямеччыны Енс Шпан чакае сур'ёзнага распаўсюджвання віруса SARS-CoV-2, які выклікае захворванне COVID-19, у краіне. «Мы знаходзімся ў пачатку эпідэміі каранавіруса ў Нямеччыне», — заявіў ён у сераду, 26 лютага, падкрэсліўшы, што ланцужкі інфекцыйнага працэсу збольшага не прасачыць, і ў гэтым навізна сітуацыі, паведамляе Deutsche Welle.
На гэтым фоне, па словах міністра, пад пытаннем, ці будзе ўдалай ранейшая стратэгія па лакалізацыі віруса і спынення ланцужкоў інфекцыйнага працэсу. За апошнія суткі COVID-19 выяўлены ў двух чалавек у федэральнай зямлі Паўночны Рэйн — Вестфалія, у чатырох — у Бадэн-Вюртэмберг і аднаго — у Рэйнланд-Пфальц.
Усяго па стане на раніцу чацвярга, колькасць захварэлых вырасла да 22.
Так, пасля пацверджання заражэння новым вірусам сямейнай пары ў Хайнсбергу (Паўночны Рэйн — Вестфалія) мясцовыя ўлады рыхтуюцца прыняць маштабныя меры, каб прадухіліць распаўсюд інфекцыі. Па словах зямельнага міністра аховы здароўя Карла-Ёзэфа Лаумана, вялікая колькасць асоб павінна быць змешчана пад хатні каранцін.
Жанчына, у якой быў выяўлены каранавірус, працуе выхавацелькай у дзіцячым садку, таму ўсе дзеці гэтай установы і іх бацькі павінны заставацца дома. Акрамя таго, у сям'і двое ўласных дзяцей школьнага ўзросту, у якіх не выяўлена сімптомаў захворвання.
Пад хатні каранцін змешчаны таксама ўсе пацыенты і персанал двух прыватных медыцынскіх кабінетаў, а таксама шэраг супрацоўнікаў Кёльнскай універсітэцкай клінікі, з якімі кантактавалі хворыя, калі хадзілі туды на прыём. Інфармацыю аб заражэнні перадалі таксама ў гасцініцу ў Нідэрландах, дзе нямецкая сям'я нядаўна правяла кароткі адпачынак. З 26 лютага зачыненыя ўсе школы і дзіцячыя сады ў акрузе Хайнсберг, яны адкрыюцца не раней за пачатак наступнага тыдня.
Учора першыя выпадкі каранавіруса зафіксаваныя ў Паўночнай Македоніі, Грузіі, Нарвегіі, а сёння ў Даніі.
Інфікаваны нядаўна вярнуўся ў Данію пасля адпачынку на гарналыжным курорце на поўначы Італіі. Мужчына знаходзіцца на хатнім каранціне.
У Італіі колькасць захварэлых дасягнула 450.
Таксама першы выпадак пацверджаны ў Эстоніі. Вірус падхапіў пастаянны жыхар рэспублікі (грамадзянін Ірана), у якога няма эстонскага грамадзянства.
Па словах міністра сацыяльных спраў Танеля Кійка, ён прыбыў у Эстонію аўтобусам з Рыгі, паветраным і марскім транспартам ён не карыстаўся. Іншаземец сам выклікаў сабе хуткую дапамогу на Талінскі аўтавакзал. Эстонскія ўлады высвятляюць інфармацыю аб іншых пасажырах гэтага аўтобуса.
Вядома, што 26 лютага ён вярнуўся ў Эстонію з Ірана.
