У Аўстрыі памерла італьянская турыстка, якая магла быць заражаная каранавірусам
Турыстка з Італіі памерла ў аўстрыйскім горадзе Бад-Кляйнкірхгайм (федэральная зямля Карынтыя). Дактары падазраюць, што яна магла быць заражаная каранавірусам новага тыпу. Пра гэта паведаміла ў сераду прэс-служба ўрада Карынтыі, піша ТАСС.
56-гадовая італьянка пражывала ў апартаментах, якія пасля яе смерці зачынілі на каранцін. Ва ўсіх пастаяльцаў бяруць аналізы. Улады спрабуюць высветліць, з кім магла кантактаваць памерлая жанчына.
Першыя два выпадкі заражэння новым каранавірусам былі зафіксаваныя напярэдадні ў аўстрыйскай федэральнай зямлі Ціроль у дваіх грамадзян Італіі. Пара прыехала з італьянскай вобласці Ламбардыя. Іх змясцілі ў каранцін, стан ацэньваецца як стабільны.
У Міністэрстве аховы здароўя Аўстрыі паведамілі, што гаворка аб закрыцці мяжы з Італіяй з-за распаўсюджвання віруса пакуль не ідзе.
