Памёр вучоны Лары Тэслер. Гэта ён прыдумаў функцыю «выразаць-капіяваць-уставіць»
Лары Тэслер, інжынер, вучоны і матэматык, памёр 17 лютага 2020 года ва ўзросце 74 гадоў, паведамляе iphone.ru
Ён нарадзіўся ў 1945 годзе ў Нью-Ёрку і вывучаў інфарматыку ў Стэнфардзе. У 1973 годзе ён пачаў працаваць у Xerox, дзе распрацоўваў функцыі Cut (Выразаць), Copy (Капіяваць) і Paste (Уставіць).
Пасля яны сталі неад'емнай часткай усіх тэкставых рэдактараў і аперацыйных сістэм.
У Xerox ён таксама распрацоўваў графічны карыстальніцкі інтэрфэйс, якім можна было кіраваць з дапамогай мышкі. Гэты прататып заўважыў Стыў Джобс і на яго базе вырашыў выпусціць першы Macintosh.
Менавіта Тэслер у 1979 годзе паказваў Джобсу напрацоўкі Xerox. У аперацыйнай сістэме Xerox былі значкі, вокны, тэчкі, курсор, усплываючыя меню, тэкставы рэдактар WYSIWYG (Што бачыш на экране, то і атрымаеш пры друку), лакальныя сеткі на аснове Ethernet і функцыі Cut, Copy і Paste.
