Заяўкі на ўдзел у праймерыз падалі шэсць чалавек. А сёмы не паспеў сабраць подпісы
Фота Надзеі Бужан
16 лютага ў 23:59 скончылася падача дакументаў для ўдзелу ў працэдуры «Народнага галасавання» (Праймерыз — абранні кандыдата ад апазіцыі на ўдзел у прэзідэнцкіх выбарах), паведаміў у сваім фэйсбуку каардынатар штаба, старшыня БСДП (Грамада) Ігар Барысаў.
У тэрмін падаць неабходны пакет дакументаў у адпаведнасці з вызначанай працэдурай здолела шэсць чалавек: Юрый Губарэвіч, Мікалай Казлоў, Павел Севярынец, Вольга Кавалькова, Ганна Канапацкая і Аляксей Янукевіч.
Прычым Кавалькова і Канапацкая для свайго ўдзелу сабралі подпісы, астатнія прэтэндэнты на званне «адзінага» былі вылучаны ад сваіх арганізацый.
Не паспеў сабраць неабходную колькасць подпісаў бізнэсовец з Фаніпаля Уладзімір Усеня (адважыўся пачаць збор подпісаў усяго за два дні да сканчэння працэдуры).
У панядзелак пачынаецца праверка дакументаў, якія паступілі ў штаб «Народнага галасавання», яна будзе працягвацца максімум два тыдні.
У сакавіку пачнецца само «народнае галасаванне», кандыдатура «адзінага» павінна быць абвешчана да канца мая.
Таксама пра свой магчымы ўдзел у выбарах заявілі кіраўнік БСДГ Сяргей Чэрачэнь, прафсаюзны лідар Аляксандр Ярашук, экс-кандыдат у прэзідэнты Мікола Статкевіч.
