«Самсунг» заблакаваў беларусам тэлевізары, прывезеныя з Польшчы і Літвы
Беларусы, якія набывалі ў Еўрасаюзе тэлевізары «Самсунг» з функцыяй СмартТБ (магчымасць падключэння да інтэрнэту), сутыкнуліся з тым, што вытворца аддалена заблакаваў іх прылады.
Дапоўнена: Праблемы закранулі і некаторых людзей, якія набывалі тэлевізары ў беларускіх інтэрнэт-крамах.
Пасля чарговага абнаўлення яны бачаць паведамленне, што іх тэлевізар працуе ў рэжыме няпоўнай функцыянальнасці. Уключыць ніводнай з праграм — ні «Ютуб», ні «Залу», ні анлайн-кінатэатры — немагчыма.
Тэлевізары ў Польшчы каштуюць танней, чым у Беларусі, таму многія набываюць іх там. А «Самсунг» вырашыў змагацца з такой практыкай, заахвочваючы кліентаў набываць тэхніку ў сваіх краінах.
У інтэрнэце апісваюць спосабы, як можна «ажывіць» тэлевізары, хаця б часткова.
Калі ёсць пульт з функцыяй кіравання голасам, можна загадаць тэлевізару адкрыць праграмы — і ён паслухаецца.
Іншы спосаб — падлучыць тэлевізар да cеткі з еўрапейскім IP-адрасам. Для гэтага трэба папярэдне ўсталяваць на камп’ютар VPN. Тады тэлевізар думае, што знаходзіцца ў адной з еўрапейскіх краін і пачынае працаваць. Але ў такім разе ўсё адно не ўключацца беларускія праграмы, напрыклад, «Зала».
