Вольга Карач пачынае абарону трансгендараў — у іх нешта не так з ідэнтыфікацыйным нумарам у пашпарце
Дырэктарка грамадзянскай кампаніі «Наш дом» Вольга Карач вырашыла прасоўваць законапраект па абароне правоў трансгендараў.
Нагадаем, што трансгендары — гэта людзі, якія змянілі пол. У Беларусі такія аперацыі праводзяцца бясплатна.
«Я мяркую, што ў Беларусі зараз каля 1000 трансгендараў. Гэта маё меркаванне, статыстычных лічбаў я не маю», — прызнаецца Карач. Але з гатоўнасцю тлумачыць важнасць абранай праблемы:
«Зразумела, што праблемы трансгендараў тычацца невялікай колькасці людзей, наўрад ці якая бабулька з Бешанковічаў прачынаецца раніцай з думкай пра трансгендараў. Але нашай кампаніі важна, каб нават гэтая нешматлікая катэгорыя людзей магла быць пачутай і мела магчымасць вырашыць іх праблему».
Вольга Карач. Фота з facebook
Яна згадвае красамоўны прыклад дыскрымінацыі трансгендараў — беларускі пашпарт.
«Калі чалавек атрымлівае пашпарт, яму прысвойваецца ідэнтыфікацыйны нумар. І больш яго змяніць нельга.
Першая лічба ў гэтым нумары ўказвае на пол чалавека. Калі чалавек мяняе пол, а разам з тым і пашпарт, стары ідэнтыфікацыйны нумар застаецца.
Гэта таўро і напамін пра мінулае, ад якога немагчыма пазбавіцца!
Праз гэта ў трансгендарных людзей узнікаюць праблемы, калі яны ўладкоўваюцца на працу або мяняюць банкаўскую картку. Ім даводзіцца «спавядвацца» староннім людзям і тлумачыць, чаму так — а гэта заўсёды дыскамфорт», — лічыць Вольга Карач.
Дык а што яна прапануе рабіць з ідэнтыфікацыйным нумарам? Канкрэтнага адказу ў Карач няма.
«Гэта тэма для дыскусіі, для шырокага абмеркавання. Мы думаем далучыць да абмеркавання міліцыю, спытацца ў іх, як яны бачыць вырашэнне праблемы. Людзі, якія сутыкнуліся з дыскрымінацыяй, лічаць, што павінна быць магчымаць нумар замяніць.
Я думаю, што трэба наогул замяніць ідэнтыфікацыйныя нумары такім чынам, каб зрабіць іх гендарна-нейтральнымі. Працы вельмі шмат, бо гэты нумар праходзіць у шмат якіх дакументах, у тых жа візах. Трэба пісаць запыт у МУС, высвятляць, ці плануюцца змены ў пашпартах беларусаў. Я атрымала пашпарт у 2018 годзе, і там па-ранейшаму ёсць прывязка да полу».
Ідэнтыфікацыйны нумар пачынаецца з адвольнай лічбы. Раней жа лічбы «1», «3» і «5» ставіліся мужчынам, якія нарадзіліся ў 19, 20 і 21 стагоддзях адпаведна. А «2», «4» і «6», адпаведна, жанчынам.
Аднак цымус сітуацыі ў тым, што міліцыя зрабіла пашпарты «гендарна-нейтральнымі» яшчэ ў 2012 годзе. Цяпер ідэнтыфікацыйны нумар пачынаецца з адвольнай лічбы для тых, хто ўпершыню атрымлівае пашпарт.
Але грамадзяне, якія ўпершыню атрымалі пашпарты да 2012 года, застаюцца з ранейшым нумарам.
«Шкада, што [магчымы] «адзіны кандыдат» Павел Севярынец будзе зноў казаць толькі пра традыцыйныя каштоўнасці, пра традыцыйныя сем’і, а гэта значыць, што праблемы і трансгендараў, і ЛГБТ-супольнасці зноў застануцца па-за ўвагай», — падсумоўвае Вольга Карач.
