Знайсці
23.01.2020 / 19:1024РусŁacБел

Мабільнай праграме па пошуку жылля прапанавалі зрабіць беларускую версію. І тут пачалося…

Ужо дастаткова працяглы час існуе платформа па пошуку жылля ў Мінску для арэнды і куплі без агентаў. Называецца яна Flatty. У іх ёсць свае каналы ў тэлеграме, старонка Укантакце, а таксама мабільная праграма.

Адзін з карыстальнікаў паставіў праграме «адзінку» (мінімальная адзнака пры максімальнай «пяцёрцы»).

Пры гэтым ён пакінуў каментар: «Дадайце, калі ласка, беларускую мову». Адказ ад Flatty быў дастаткова хуткім: «Наш праграміст зробіць гэта за два рабочыя дні. Гадзіна ягонай працы каштуе 40 рублёў. Задоньце (ахвяруйце — Рэд.) на Яндэкс.Грошы суму, эквівалентную 640 рублям, і тады зробім».

Адказ прадстаўнікоў праекта абурыў некаторых беларускамоўных і спачуваючых карыстальнікаў. У выніку людзі пачалі заходзіць у Google Play, каб паставіць праграме мінімальную адзнаку. На сёння яна ўжо ўпала амаль да «тройкі». У каментах людзі просяць беларускую версію.

«Набеглі свядомыя і паставілі 100+ адзінак. Упэўнены, што 99,9% пра гэту праграму нават не чулі. Сабака брэша, а караван ідзе», — дастаткова ў правакацыйнай форме напісаў адзін са стваральнікаў праграмы ў твітары.

«НН» звярнулася да хлопцаў з Flatty, каб тыя патлумачылі сутнасць сітуацыі і што збіраюцца рабіць далей.

«Наша Ніва»: Калі распрацоўвалі праграму, то зусім не думалі пра беларускамоўную версію?

Flatty: Існуём у фармаце тэлеграм-канала ўжо паўтара года, выраслі да 24 000 падпісчыкаў па сарафанным радыё, і за гэты час не было ні разу нараканняў з боку аўдыторыі на тое, што ўсё на расейскай. Для зваротнай сувязі мы адкрытыя, як бачыце. Пакуль рабілі дадатак (гэта першы досвед для нас у гэтай сферы), было мноства іншых праблем тэхнічнага характару, тут варта прызнаць першапачатковую памылку, закладзеную ў архітэктуру.

«НН»: Якое ўвогуле персанальнае стаўленне ў стваральнікаў праграмы да беларускай мовы?

Flatty: Гэта наша родная мова, не размаўляем на ёй штодня, на жаль, але паважаем як культурную каштоўнасць.

«НН»: У вас няма магчымасці зрабіць праграму задарма, толькі за грошы?

Flatty: Гэта наша хобі, усе жаданні карыстальнікаў рэалізуюцца бясплатна і без праблем. На фоне праблем з iOS-най часткай (там не працавалі паведамленні)

мы сарваліся на чалавека, які прыйшоў і паставіў адзін бал праграме за адсутнасць мовы. Але і вы павінны разумець, што любая выкананая праца павінна быць чымсьці ўзнагароджаная.

І неабавязкова гэта павінен быць грашовы эквівалент. «Адзінка» была ўспрынятая намі занадта блізка да сэрца. У чалавека іншыя прыярытэты аказаліся.

«НН»: Калі была б магчымасць адказаць на гэтую прапанову яшчэ раз, то вы б адказалі гэтаксама?

Flatty: Думаю, так. Ці было гэта для нас урокам? Так, было. Але пасыл у каментары застаўся б тым жа. І наш адказ, незалежна ад таго, як ён мог бы быць напісаны, быў бы ўспрыняты так, як яго захацелі б успрыняць.

«НН»: Як думаеце паправіць сабе рэйтынг?

Flatty: Карыстальнікі, якіх усё задавальняе і ім усё падабаецца, самі зробяць з часам гэта. А такіх нямала насамрэч. Мы гэта робім не дзеля рэйтынгаў, а каб дапамагчы людзям.

«НН»: Ці не сапсуе такая колькасць нізкіх адзнак ваш бізнэс?

Flatty: Гэта не бізнэс. Вельмі гучна было б так называць праграму, якая робіцца вечарам двума людзьмі, якія сядзяць за куханным сталом. Колькасць адзінак зніжае матывацыю займацца і развіваць праект у будучыні.

«НН»: Ці не лічыце, што сутыкнуліся з цкаваннем вашага праекту?

Flatty: Упэўненыя, што пераважная частка людзей, якія паставілі «адзінкі» і водгукі пра беларускую мову, нават не ведаюць пра функцыі праграмы і ніколі не чулі пра яе. Так, ёсць рэчы, над якімі нам яшчэ варта папрацаваць, за якія можна было б атрымаць нізкую адзнаку. Так, распрацоўшчык мог бы адказаць і мякчэй. Але, прабачце, ставіць «адзінкі» проста за кампанію?

Зміцер Панкавец

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера