Мінфін: Неабходнасці ў змене бюджэту Беларусі з-за сітуацыі з расійскай нафтай няма
Мінфін Беларусі не бачыць неабходнасці ў карэкціроўцы бюджэту ў сувязі з адсутнасцю паступленняў у бюджэт экспартных пошлін на сырую нафту. Пра гэта заявіў журналістам міністр фінансаў Максім Ермаловіч, піша Tut.by.
Пакуль казаць пра нейкія змены гадавых даходаў бюджэту рана. Мы працуем у штатным рэжыме. Ніякіх рашэнняў, звязаных са змяненнем умоў пастаўкі нафты, не прымалі, працуем па зацверджаным бюджэце. Неабходнасці ў экстраннай змене бюджэту няма, — сказаў Ермаловіч.
Міністр адзначыў, што некалькі лепш, чым планавалася, выкананы бюджэт мінулага года.
— Таму мы дастаткова падрыхтавана ўваходзім у бюджэт 2020 года і з пункту гледжання валютных рэсурсаў, і з пункту гледжання рублёвых рэшткаў на рахунках. Мы вельмі добра падрыхтаваліся да любых рызык, звязаных у тым ліку з працай нафтагазавага комплексу, - запэўніў ён.
Ермаловіч таксама распавёў, што ў першым квартале 2020 года Беларусь рыхтуецца да выхаду на рынак запазычанняў з чарговым выпускам еўрабондаў на 1-1,2 млрд даляраў.
