Пампеа адклаў візіт ва Украіну з-за беспарадкаў ля пасольства ў Іраку
Дзяржсакратар ЗША Майк Пампеа ў сувязі з пратэстамі каля будынка амерыканскай амбасады ў Багдадзе вырашыў адкласці візіт ва Украіну. Пра гэта паведамляе агенцтва AFP са спасылкай на заяву Дзяржаўнага дэпартамента ЗША.
Раней паведамлялася, што дзяржсакратар ЗША Майк Пампеа перанёс таксама афіцыйны візіт ва Узбекістан, запланаваны на 5—6 студзеня.
Паводле інфармацыі Міністэрства замежных спраў Узбекістана, візіт пераносіцца «на больш позні тэрмін» «па дамоўленасці». Іншых падрабязнасцей няма.
Перанос звязаны з абвастрэннем сітуацыі ў Іраку, дзе праіранскія сілы атакавалі пасольства ЗША. Вашынгтон быў вымушаны дадаткова перакінуць у Ірак 750 вайскоўцаў.
Пампеа планаваў наведаць па чарзе Украіну, Беларусь, Казахстан, Узбекістан і Кіпр.
Візіт у Беларусь разглядаецца як праява нармалізацыі адносін між дзвюма краінамі на фоне патрабаванняў Масквы перайсці да «паглыбленай інтэграцыі» між дзвюма дзяржавамі.
