Мэрыя Варшавы патлумачыла словы пра «беларускі дух», ад якога «трэба пазбавіць горад»
На прэзэнтацыі канцэпцыі цэнтра Варшава, мэр польскай сталіцы Рафал Тшаскоўскі заявіў, што над горадам «стаіць беларускі дух» і што прагнаць яго здольныя зьмены, якія ён прапануе. Прэс-сакратар мэрыі патлумачыў Свабодзе, што меў на ўвазе Тшаскоўскі.
— Пэўная частка гораду была запраектаваная нашымі «савецкімі сябрамі», таму над ім стаіць савецкі і беларускі дух. — сказаў мэр Тшаскоўскі, прадстаўляючы канцэпцыю «Усьмешка Варшавы», якая прадугледжвае больш пераходаў для мінакоў, роварных сьцежак і зеляніны.
Паводле Тшаскоўскага, прапанаваныя ім зьмены змогуць прагнаць з Варшавы «беларускі дух».
Словы пра «беларускі дух» абурылі карыстальнікаў сацыяльных сетак, сярод якіх і беларусы Варшавы. Заяву Рафала Тшаскоўскага яны ўспрынялі як праяву вышэйшасьці і абразу. Свабода скантактавалася з прэс-сакратаром варшаўскай мэрыі Камілям Дамбровам. Ён патлумачыў, што меў на ўвазе Тшаскоўскі.
— Кажучы пра «беларускі дух», мэр Тшаскоўскі меў на ўвазе архітэктуру і ўрбаністычныя савецкія і постсавецкія рашэньні, якія закранулі таксама і гарады БССР. Гаворка вялася выключна пра архітэктуру. Мэр Варшавы бачыць гэтыя падабенствы паміж Варшавай і Менскам і хоча зьмяняць горад, каб ачысьціць Варшаву ад сацрэалізму.
Каміль Дамброва запэўніў, што мэр польскай сталіцы шануе ўсіх жыхароў і гасьцей Варшавы, незалежна ад нацыянальнасьці.
— Варшава павінна быць адкрытай і горадам для ўсіх. Усе, хто сумленна працуе і паважае закон, маюць права лічыць гэты горад сваім. У тым ліку і госьці з Усходняй Эўропы. У мэра Тшаскоўскага вельмі сардэчнае стаўленьне да беларусаў, украінцаў, расейцаў. Гэтыя словы былі накіраваныя ня супраць людзей, а супраць падыходу да архітэктуры, які выкарыстоўваўся ў Менску або Берасьці.
Рафал Тшаскоўскі ўзначальвае мэрыю Варшавы ад 2018 году. Яму 47 гадоў. Па адукацыі ён палітоляг, доктар гуманітарных навук. На выбары ішоў ад лібэральнай «Грамадзянскай плятформы» і перамог у першым туры, набраўшы 56% галасоў.
