Лукашэнка 2 снежня едзе з афіцыйным візітам у Сербію
Аляксандр Лукашэнка 2-3 снежня будзе з афіцыйным візітам у Сербіі. Пра гэта БЕЛТА паведамілі ў прэс-службе кіраўніка Беларусі.
Фота з архіва прэс-службы прэзідэнта
У Бялградзе Аляксандр Лукашэнка правядзе перамовы з прэзідэнтам Сербіі Аляксандрам Вучычам. На сустрэчы ў вузкім і пашыраным колах кіраўнікі дзяржаў абмяркуюць развіццё палітычнага дыялогу і эканамічнага ўзаемадзеяння паміж краінамі.
«Асаблівую ўвагу прэзідэнты нададуць перспектывам павелічэння тавараабароту, ініцыятывам па стварэнню сумесных вытворчасцей і запуску ўзаемных інвестыцыйных праектаў. Таксама абмяркуюць рэгіянальны і сусветны парадак дня, супрацоўніцтва на міжнародных пляцоўках», — распавялі ў прэс-службе. Па выніках перамоваў будзе падпісаны пакет двухбаковых дакументаў.
Праграмай візіту Аляксандра Лукашэнкі прадугледжана яго сустрэча са старшынёй Народнай скупшчыны Сербіі Маяй Гайковіч і дэпутатамі вышэйшага заканадаўчага і канстытуцыйнага органа краіны.
У гэтыя ж дні ў Бялградзе пройдзе беларуска-сербскі бізнэс-форум, на якім чакаецца падпісанне камерцыйных кантрактаў і пагадненняў.
Апошні раз прэзідэнты Беларусі і Сербіі бачыліся ў чэрвені гэтага года: Аляксандр Вучыч прылятаў у Мінск, каб наведаць II Еўрапейскія гульні.
У Сербіі дзейнічаюць лініі па зборцы трактароў МТЗ і аўтобусаў МАЗ, вядзецца праца па стварэнні сумеснай вытворчасці камбайнаў «Гомсельмаш» у Крагуевацы. Ажыццяўляецца праект па выпуску для МУС Сербіі 33 пажарных машын на базе шасі МАЗ.
На тэрыторыі Беларусі сэрбская кампанія «Дана Холдынг» працягвае рэалізацыю буйных будаўнічых праектаў — «Маяк Мінска» і «Мінск-Мір». Усяго ў Беларусі зарэгістравана 7 арганізацый з удзелам сербскага капіталу.