Тысячы беларусаў развіталіся з Каліноўскім пад нацыянальнымі сцягамі — шмат ФОТА Надзеі Бужан
Тысячы беларусаў узялі ўдзел ва ўрачыстай цырымоніі пахавання Кастуся Каліноўскага і двух дзясяткаў паўстанцаў 1863 года.
Вуліцамі Вільні прайшло грандыёзнае шэсце пад бел-чырвона-белымі сцягамі. Яго можна лічыць самай масавай беларускай маніфестацыяй за межамі сучаснай краіны. Прычым нашых сцягоў было ў разы больш, чым літоўскіх ці польскіх.
На цырымоніі развітання з Каліноўскім прысутнічалі прэзідэнты Літвы і Польшчы, пісьменнік Уладзімір Арлоў, былы кіраўнік Беларусі Станіслаў Шушкевіч, старшыня Рады БНР Івонка Сурвіла, мастак Аляксей Марачкін, спявачка Кася Камоцкая, грамадскія дзеячы Павел Белавус, Зміцер Дашкевіч, Алена Макоўская і Ніна Шыдлоўская, палітыкі Уладзімір Някляеў, Павел Севярынец, Мікола Статкевіч, а таксама многія іншыя неабыякавыя беларусы. Афіцыйную дэлегацыю ўзначальваў віцэ-прэм'ер Ігар Петрышэнка.
Каліноўскі паяднаў у калоне людзей розных палітычных поглядаў. Хрысціянскія дэмакраты і лібералы, нацыяналісты і сацыялісты, вернікі і атэісты ішлі разам.
Ігар Петрышэнка выступаў па-беларуску, запэўніў, што Каліноўскі назаўжды ўпісаны ў гісторыю Беларусі. Аднак, калі заявіў, што асобу кіраўніка паўстання не трэба выкарыстоўваць у палітычных мэтах, слухачы на вуліцы сталі асвістваць Петрушэнку. Чулася магутнае скандаванне «Ганьба».
Развітанне адбылося ў Кафедральным саборы-базіліцы Св. Станіслава і Св. Уладзіслава ў цэнтры Вільні. Пасля працэсія рушыла да могілак Росы. Па дарозе спыніліся каля Вострай Брамы, дзе адбылася малітва.
