Стаў вядомы матыў забойства сына экс-прэзідэнта ФРГ
Абвінавачаны ў забойстве доктара Фрыца фон Вайцзэкера здзейсніў злачынства з-за «непрыязнасці да сям'і забітага, хутчэй за ўсё, выкліканай псіхічнай хваробай», піша dw.com.
Пра гэта ў сераду, 20 лістапада, паведаміла прэс-служба берлінскай пракуратуры. Яна таксама агучыла падрабязнасці асобы падазраванага — гэта 57-гадовы раней не судзімы грамадзянін Германіі, які жыве ў зямлі Рэйнланд-Пфальц на захадзе краіны.
Абвінавачаны прыбыў у Берлін, паколькі даведаўся, што Фрыц фон Вайцзэкер чытае публічны даклад, падчас якога і было здзейснена забойства. У сераду абвінавачваны прайшоў абследаванне ў псіхіятрычнай клініцы, дзе і будзе ўтрымлівацца, па меншай меры, да абвяшчэння вынікаў.
Паводле выдання Der Tagesspiegel, абвінавачаны абгрунтаваў сваю «непрыязнасць» сувязямі бацькі забітага лекара, былога мэра Заходняга Берліна (1981—1984) і прэзідэнта Германіі (1984—1991) Рыхарда фон Вайцзэккера з хімічным канцэрнам Boehringer Ingelheim, які той узначальваў у 1960-я. Лічыцца, што вырабленыя канцэрнам хімікаты выкарыстоўваліся амерыканскай арміяй падчас вайны ў В'етнаме.
Лекар Фрыц фон Вайцзэкер, кіраўнік аддзялення ўнутранай медыцыны прыватнай берлінскай клінікі, быў забіты ў аўторак, 19 лістапада, падчас свайго выступу, прысвечанага захворванням печані. Ён чытаў даклад у сваёй клініцы перад 20 слухачамі, калі на яго напаў з нажом чалавек, які знаходзіўся ў зале, і смяротна параніў. Паліцэйскі ў цывільным, што быў сярод гледачоў, спрабаваў перашкодзіць нападніку, але сам атрымаў цяжкае раненне. Загінуламу было 59 гадоў.