Лукашэнка незадаволены выступам спартсменаў на міжнародных спаборніцтвах
Аляксандр Лукашэнка лічыць недастатковымі спартыўныя дасягненні беларускіх атлетаў на сусветных першынствах. Пра гэта ён заявіў сёння на Алімпійскім сходзе НАК Беларусі, перадае БЕЛТА.
Улічваючы, што да Алімпіяды ў Токіа засталося крыху больш за паўгода, Аляксандр Лукашэнка адзначыў неабходнасць надаць галоўную ўвагу летнім алімпійскім відам спорту. Тым больш, што практычна ўсе чэмпіянаты свету 2019 года завершаны і па іх выніках можна рабіць цалкам канкрэтныя высновы.
Ён канстатаваў, што ў гэтым годзе на сусветных першынствах беларускія спартсмены заваявалі ў алімпійскіх дысцыплінах ўсяго толькі восем медалёў, у тым ліку два залатыя. Большасць у веславанні на байдарках і каноэ. Больш-менш стабільна на працягу апошніх гадоў выступаюць прадстаўнікі сучаснага пяціборства.
«Але гэта толькі два камплекты медалёў на Алімпіядзе, — заўважыў кіраўнік дзяржавы. — А астатнія? Без медалёў у алімпійскіх нумарах праграмы вярнуліся з сусветных першынстваў баксёры, веласіпедысты, мастацкая гімнастыка. Нулявы вынік у нас і ў такіх медалеёмістых відах спорту, як плаванне, лёгкая атлетыка, дзюдо, фехтаванне, стральба кулявая, спартыўная гімнастыка, веславанне акадэмічнае».