Лукашэнка пра будучы парламент: Якая розніца, будзе там тры-чатыры агалцелыя апазіцыянеры ці не?
Улада падтрымлівае некаторых кандыдатаў у дэпутаты, аднак не навязвае грамадзянам выбар. Пра гэта Аляксандр Лукашэнка заявіў сёння, адказваючы на пытанні журналістаў, піша БелТА.
«Што ў мяне на стале ўжо «ляжаць» 110 дэпутатаў, якіх абяруць, — гэта смех. У нас у мінулым парламенце было некалькі адкрытых, відавочных апазіцыянераў і некалькі людзей, якія думалі інакш, чым я. Яны не былі ў апазыцыі, але думалі па-іншаму. Вы што, хочаце сказаць, што яны былі ў спісах 110?» — спытаў Аляксандр Лукашэнка.
Ён прызнаўся, што дзяржава, працоўныя калектывы падтрымліваюць некаторых кандыдатаў у дэпутаты, аднак не збіраюцца навязваць выбар грамадзянам. Да таго ж, звярнуў ён увагу, парламент у Беларусі не з'яўляецца Вярхоўным саветам.
«Якая розніца прэзідэнту, будзе там тры-чатыры агалцелыя апазіцыянеры ці не? Яны ж не будуць вызначаць палітыку парламента і, тым больш, краіны», — растлумачыў кіраўнік дзяржавы.
У той жа час Аляксандр Лукашэнка падкрэсліў, што яму б не хацелася, каб у парламенце быў шум і адбываліся гадасці.
