«Права выбару»: 490 парушэнняў на датэрміновым галасаванні, 16 назіральнікаў пазбавілі акрэдытацыі
За тыдзень датэрміновага галасавання на выбарах дэпутатаў Палаты прадстаўнікоў назіральнікі кампаніі «Права выбару» зафіксавалі 490 парушэньняў выбарчага заканадаўства, паведаміў на брыфінгу прэс-сакратар Аляксей Янукевіч, піша Радыё Свабода
Сярод парушэнняў пераважае неадпаведнасць колькасці выбаршчыкаў у пратаколах камісій з падлікамі назіральнікаў, а таксама неналежнае захаванне скрыняў для галасаваньня. З гэтай нагоды была пададзена 281 скарга.
За гэты час 16 назіральнікаў кампаніі «Права выбару» былі пазбаўленыя акрэдытацыі.
«Самая нізкая яўка падчас датэрміновага галасавання зафіксаваная ў Гомельскай-Цэнтральнай акрузе № 33 — 12,4%, — расказаў Янукевіч. — Камісіі даюць 25,9%».
На Коласаўскай акрузе № 106 і Пушкінскай № 103, паводле падлікаў назіральнікаў, яўка была самая вялікая — 21,4% і 21% адпаведна. Выбарчыя камісіі паведамляюць пра 29,9% і 30,1%.
Агулам кампанія «Права выбару» ахапіла 350 выбарчых участкаў і падрыхтавала 950 назіральнікаў.