Ілан Маск будуе першы завод Tesla ў Еўропе
Амерыканскі мільярдэр і вынаходнік Ілан Маск вызначыўся з месцам для будаўніцтва свайго першага аўтазборачнага завода ў Еўропе - ім стане Берлін, піша bbc.com.
«Нямецкая інжынерная думка — выбітная (…) Берлін круты. Адны з найлепшых аўтамабіляў зробленыя ў Германіі», - сказаў прадпрымальнік, атрымліваючы ў Германіі прэмію Golden Steering Wheel.
Пачынаючы з 2021, як чакаецца, на заводзе будзе вырабляцца Tesla Model 3 і новы кампактны пазадарожнік Model Y. Па словах Маска, завод будзе размешчаны побач з новым берлінскім аэрапортам Берлін-Брандэнбург. У Твітары Маск растлумачыў, што менавіта будуць вырабляць на заводзе: «Акумулятары, рухавікі і аўтамабілі Tesla, пачынаючы з мадэлі Y».
Цікавасць да вытворчасці ў Германіі звязаны з ростам попыту на электрамабілі ў Еўропе.
Аналіз галіны паказаў, што ў бліжэйшыя гады найбуйнейшыя заводы па вытворчасці электрамабіляў будуць размешчаныя ў Германіі, Францыі, Іспаніі і Італіі.
Каля 16 буйных заводаў па вытворчасці літый-іённых акумулятарных батарэй павінны пачаць працу ў Еўропе да 2023 года.
Чаму Берлін?
Планы Маска могуць падштурхнуць развіццё прамысловасці ў Германіі - у апошнія гады кампаніі БМВ выбралі месцам для сваіх новых заводаў Венгрыю.
У самой Германіі аўтапрам пацярпеў пасля скандалу з Volkswagen і тэстамі на выкіды.
Усё гэта прывяло да значнага запаволення росту сектара, які кампанія Маска, магчыма, здольная зрушыць.
Амерыканскі вынаходнік і бізнесмен дзякуючы заводу ў Берліне атрымае магчымасць прадаваць электрамабілі з пазнакай «зроблена ў Германіі». Акрамя таго, дыверсіфікацыя вытворчасці па краінах можа быць карыснай для абыходу экспартных і імпартных мытаў у розных краінах.
Паводле інфармацыі агенцтва Рэйтэр, завод Маска будзе знаходзіцца недалёка ад польскай мяжы, што патэнцыйна можа дапамагчы яму скараціць кошт вытворчасці з дапамогай таннай працоўнай сілы.
Кітайскі завод
Разам з выхадам на еўрапейскі рынак Маск не забывае і пра Кітай, дзе плануе таксама адкрыць завод. Гэта найбуйнейшы аўтамабільны рынак свету, але продажы скараціліся з-за росту тарыфаў, выкліканага гандлёвай вайной паміж ЗША і Кітаем.
Шанхайскі завод Маска коштам 2 мільярды долараў будзе вырабляць мадэлі Tesla 3 і Y.