Навагоднюю ілюмінацыю ў Мінску ўключаць 14 снежня
Фота Волі Афіцэравай
Навагодняя ілюмінацыя будзе ўключана ў Мінску сёлета 14 снежня. Як расказаў «Мінск-Навінам» дырэктар Мінгарсвятла Славамір Грыневіч, агульная даўжыня задзейнічаных для гэтага паветраных і кабельных ліній складзе 108 км.
Для святочнай ілюмінацыі горада маюць намер выкарыстаць 4 685 гірляндаў, 1 483 светлавыя матывы, 227 светлавых канструкцый, у тым ліку 33 аб'ёмныя фігуры, такіх як вялікіх памераў мяч ля Дома футбола, клюшкі з шайбай насупраць «Мінск-Арэны», «Ласі» на вул. Прытыцкага.
Магутнасць усёй ілюмінацыі складзе 956 кВт, што не перавышае 4% у агульнай структуры спажывання гарадскога асвятлення. На каталіцкае і праваслаўнае Раство, у Новы год і на Стары новы год яна будзе працаваць на працягу ўсёй ночы.
Адключаць святочную ілюмінацыю ў наступным годзе. Гэта адбудзецца 15 студзеня.
