А-100 будуе новы жылы раён і збіраецца пракласці электрасеткі праз ахоўную зону Курапатаў
У «Нашу Ніву» звярнулася чытачка Наталля, жыхарка Савецкага раёна Мінска. Яна наракае, што праз ахоўную зону Курапатаў і вадаахоўную зону Цнянскага вадасховішча збіраюцца пракладаць электрасеткі.
«Прычым межы ахоўных зон можна абмінуць, калі разгледзець іншыя варыянты пракладкі сетак. Але замоўца настойвае на варыянце праз Курапаты, бо так танней», — абураецца Наталля.
Электрасеткі насамрэч збіраюцца весці праз ахоўную зону ў Курапатах. Але ў рэальнасці іх пракладуць уздоўж існуючай трасы Заслаўе — Калодзішчы. Курапацкі лес закранаць не плануюць.
«Наша Ніва» распыталася пра сітуацыю ў кіраўніка праектаў кіравання дабудаўнічай падрыхтоўкі ТАА «Астадэвелапмэнт» Анатоля Шэнглера.
«Мы разглядалі розныя варыянты. Нават думалі пракладваць сеткі праз горад. Але разбурыць дарогі, тратуары будзе больш праблематычна і куды больш затратна, чым весці сеткі па незабудаванай тэрыторыі. Да таго ж даўжыня гэтых сетак крытычная. Калі мы будзем класці іх у абыход, то магутнасці не хопіць, каб засілкаваць новыя раёны.
Што датычыцца дазволу на пракладку сетак, то мы яго атрымалі ва ўсіх 15 інстанцыях, дзе павінны былі атрымаць, у тым ліку ў Міністэрстве культуры, якое дазволіла пракладваць сеткі праз ахоўную зону ў Курапатах.
Усе неабходныя дакументы ў нас на руках, патрабаванне закона аб неабходнасці правядзення грамадскага абмеркавання мы таксама выканалі», — кажа Анатоль Шэнглер.
Грамадскае абмеркаванне адбудзецца 13 лістапада у 17:00 у будынку Бараўлянскага ДК.
Пра гэта паведамляе сайт Мінскага раённага выканаўчага камітэту.
«Мы дзейначаем па законе, таму я не ведаю, на што можа паўплываць грамадскае абмеркаванне», — прызнаецца Анатоль Шэнглер.
