Па Варшаве на Дзень незалежнасці прайшлі маршам дзясяткі тысяч нацыяналістаў
Дзясяткі тысяч дэманстрантаў, галоўным чынам члены ультранацыяналістычных арганізацый, прайшлі ў панядзелак, 11 лістапада, маршам па Варшаве з нагоды Дня незалежнасці Польшчы. Шэсце нацыяналістаў суправаджалася скандаваннем традыцыйнага у Польшчы лозунгу ультраправых — «Бог, гонар, айчына», піша tut.by.
Многія дэманстранты неслі чырвона-белыя польскія сцягі. Неўзабаве пасля пачатку акцыі некалькі актывістаў падпалілі сігнальныя ракеты, пасля чаго асобныя ўчасткі маршруту завалакло дымам.
«Мы павінны вярнуцца да сваіх каранёў. Наш свет забыўся пра Бога і хрысціянства», — лічыць адзін з лідараў нацыяналістычнай арганізацыі «Марш за незалежнасць» Роберт Бакевіч.
Сітуацыя ў Польшчы сур'ёзна палярызавалася пасля прыходу да ўлады кансерватыўнай партыі Яраслава Качыньскага «Права і справядлівасьць» (ПіС) у 2015 годзе. Яе члены настойваюць на адраджэнні патрыятычных і каталіцкіх каштоўнасцяў у грамадстве і на адмове ад заходняга лібералізму, нагадвае Reuters. Крытыкі партыі сцвярджаюць, што яна негалосна заахвочвае групы са схільнасцю да фашысцкай і антысеміцкай ідэалогіі, аднак у ПіС гэта адмаўляюць.
Ні члены ўрада, ні прэзідэнт Анджэй Дуда у маршы не ўдзельнічалі. Нароўні з шэсцем ў Варшаве адбыліся памятныя мерапрыемствы: ускладанне вянкоў, парады і канцэрт.
