У Маскве прафесара, які назваў рускую мову ў яе цяперашнім стане «ўбогай і клаачнай», змушаюць прабачыцца
Фота са старонкі Гасана Гусейнава ў фэйсбуку.
Ад прафесара факультэта гуманітарных навук Вышэйшай школы эканомікі (ВШЭ) у Маскве, доктара філалогіі Гасана Гусейнава патрабуюць прабачэння за яго выказванне ў фэйсбуку.
На сваёй старонцы ў ФБ Гусейнаў задаўся пытаннем, «чаму некаторым расіянам здаецца, што рускім ва Украіне невыносна вывучыць да сваёй рускай мовы яшчэ і ўкраінскую». І адказаў на яго так: «Таму што, прыехаўшы, напрыклад, у Берлін, гэтыя разумныя людзі не дзівяцца, убачыўшы ў тамтэйшых кіёсках газеты не толькі на нямецкай, але і на рускай і турэцкай, сербскай i французскай, грэцкай і польскай, англійскай і італьянскай. А ў Маскве, з сотнямі тысяч украінцаў, татар, кіргізаў і ўзбекаў, кітайцаў і немцаў, са свечкаю немагчыма знайсці нічога на іншых мовах, акрамя той убогай клаачнай рускай, на якой цяпер гаворыць і піша гэтая краіна».
Яго выказванне працытавалі многія расійскія СМІ, разгарэліся спрэчкі ў сацыяльных сетках. Пазней фэйсбук выдаліў гэтае выказванне пасля шматлікіх скаргаў расейскіх карыстальнікаў.
Камісія па этыцы ВШЭ рэкамендавала прафесару «прынесці публічныя прабачэнні за свядомы распаўсюд непрадуманых і безадказных выказванняў, якія нанеслі шкоду дзелавой рэпутацыі ўніверсітэта, а таксама дэзавуяваць дадзеныя выказванні».
Гасан Гусейнаў адмовіўся гэта рабіць.
Канфлікт стаў тэмай шматлікіх абмеркаванняў у расійскіх СМІ.
