Качанава пра ініцыятыву зрабіць 31 снежня выходным: Як вырашаць людзі, так і будзе
Кіраўнік Адміністрацыі прэзідэнта Наталля Качанава пракаментавала ініцыятыву зрабіць 31 снежня дзяржаўным выходным днём, піша Tut.by
— Я вельмі спакойна стаўлюся да 31 снежня. Як вырашаць людзі, так і будзе, як вырашыць урад. Галоўнае, каб было зручна і камфортна. Мне ўсё роўна, я працую і 31, і 7-га, для нас гэта не прынцыпова, — заявіла Наталля Качанава, адкрываючы басейн у Шабанах.
Нагадаем, ініцыятыву зрабіць 31 снежня выходным днём актыўна абмяркоўваюць у грамадстве. Адпаведная петыцыя з'явілася ў інтэрнэце. Разабрацца ў пытанні паабяцаў і прэм'ер-міністр краіны.
— Мне трэба глыбей паглыбіцца ў пытанне. Не разумею, чаму 31-га снежня, вось пра 2-е больш разумею: аднаго дня мала. Абяцаю, што вывучу гэтае пытанне, — сказаў учора журналістам Сяргей Румас.
Нагадаем, у 2019 годзе 31 снежня прыпадае на аўторак, і гэта працоўны дзень. А вось у сераду і чацвер, 1 і 2 студзеня, мы адпачываем. У пятніцу трэба будзе ісці на працу. У навагодні тыдзень рабочай таксама будзе субота: менавіта на 4-е перанесены працоўны дзень за другое студзеня. Такое рашэнне прынялі ва ўрадзе.
