Праваслаўная царква прызнала святымі пакутнікамі 30 беларусаў, забітых польскімі партызанамі
Усе беларускія праваслаўныя фурманы, забітыя ў 1946 годзе на Беласточчыне атрадам Рамуальда Райса «Бурага», па імёнах далучаныя да групы пакутнікаў Холмскіх і Падляшскіх земляў. Так вырашылі епіскапы Польскай праваслаўнай царквы, піша Радыё Свабода.
Беларусы ў Варшаве пратэстуюць супраць гераізацыі Рамуальда Райса «Бурага»
Іх ушанаванне прызначанае на дзень Іконы Заляшанскай Божай Маці, гэта значыць на апошнюю суботу ліпеня. 31 студзеня 1946 «выклятыя жаўнеры» з аддзелу «Бурага» забілі 30 праваслаўных фурманаў з 12 вёсак на Гайнаўшчыне — Краснае Сяло, Збуч, Чыжы, Вялікія Пасечнікі, Ягаднікі, Лозіцы, Махнатае, Залешаны, Ракавічы, Крывая, Арэшкава, Выганоўская Волька — якія, на загад улады, паехалі ў пушчу на нарыхтоўку дроваў для школы.
Фурманоў, якія ўмелі перажагнацца па-каталіцку і згаварыць пацер па-польску, «Буры» адпусціў дадому. А праваслаўных ягоныя жаўнеры, паводле некаторых сведчанняў, забівалі сякерамі, бо шкадавалі патронаў.
Рамуальда Райса камуністы злавілі ў 1948 годзе, судзілі ў Беластоку і павесілі пад канец 1949 году. У судзе «Буры» сваёй віны не прызнаў, звальваючы адказнасць за спаленыя вёскі і забітых беларускіх сялян на свайго намесніка.
Назва «выклятыя жаўнеры» ўжываецца з 1993 года, калі яе ўпершыню выкарасталі ў назве выставы, прысвечанай антыкамуністычнаму пасляваеннаму падполлю ў ПНР.
Холмскія і падляшскія пакутнікі — гэта быў зборны тэрмін для праваслаўных святых пакутнікаў, кананізаваных 7 і 8 чэрвеня 2003 года Польскай Аўтакефальнай Праваслаўнай Царквой. Усе яны загінулі падчас Другой сусветнай вайны. Большасць зь іх былі забітыя польскімі партызанамі.
Чытайце:
Беларуская памяць пра «жаўнераў выклентых»
«Дзеянні не заўсёды адназначныя этычна». У Польшчы апраўдалі «Бурага», які ў 1946-м спаліў пяць беларускіх вёсак
Унук Райса «Бурага»: «Дзед забіваў ворагаў Айчыны, а сярод іх было шмат беларусаў»
Беларусы і «выклятыя жаўнеры»: паміж дзвюма таталітарнымі ідэалогіямі
Дырэктарка «Белсата»: Мяне непакоіць рэабілітацыя «Бурага»
Польскі пракурор пра рэабілітацыю Бурага: «Не мае юрыдычнай сілы»
