Новы рэкорд. Беларусы вінны банкам пад 13,5 мільярда рублёў
Запазычанасць беларусаў перад банкамі працягвае біць рэкорды. Паводле Нацбанка, на 1 кастрычніка гэтага года агульны аб'ём выдадзеных беларусам крэдытаў складаў 13 млрд 343,4 млн руб. У гэтай суме ўлічваюцца спажывецкія крэдыты, крэдыты на нерухомасць, аўтакрэдыты і нават карты растэрміноўкі, піша tut.by.
У параўнанні з папярэднім месяцам агульны аб'ём крэдытаў фізічных асоб вырас на 271,4 млн рублёў, з пачаткам года — на 1 млрд 747 млн рублёў, з кастрычнікам мінулага года — на 2 млрд 457,5 млн руб.
Аб'ём выдадзеных крэдытаў на спажывецкія патрэбы на 1 кастрычніка склаў 5 млрд 257,7 млн руб. У параўнанні з пачаткам года гэтая лічба павялічылася на 872,4 млн, а з кастрычнікам мінулага года — на 1 млрд 238 млн.
Выдадзеныя крэдыты на фінансаванне нерухомасці раўняюцца 8 млрд 85,7 млн руб. Іх аб'ём таксама расце: у параўнанні з пачаткам года — на 874,5 млн рублёў, з мінулым годам — на 1 млрд 219,5 млн руб.
У красавіку гэтага года Нацбанк паведамляў, што калі крэдытны бум не пойдзе на спад, не выключана, што выдачу спажывецкіх крэдытаў могуць зрабіць больш жорсткай.