У Брэсце 23-гадовага студэнта знялі з выбараў у парламент. Ён абскардзіў рашэнне ЦВК
23-гадовага студэнта Варшаўскага універсітэта Уладзіслава Сысу, які вылучаўся кандыдатам у дэпутаты па Брэсцкай Усходняй выбарчай акрузе № 3, знялі з удзелу ў парламенцкіх выбарах, піша tut.by.
Уладзіслаў Сыса вылучаўся ад Беларускай сацыял-дэмакратычнай грамады. 17 кастрычніка акруговая камісія зарэгістравала яго кандыдатам і ўручыла пасведчанне. Аднак праз 5 дзён малады чалавек даведаўся, што з удзелу ў электаральнай гонцы яго знялі.
23 кастрычніка ён атрымаў рашэнне абласной выбарчай камісіі, згодна з якім у рэгістрацыі кандыдатам яму было адмоўлена, бо ён вучыцца ў Польшчы і пастаянна не жыве на тэрыторыі Беларусі, паведаміў tut.by Уладзіслаў Сыса. Малады чалавек з гэтым не пагадзіўся і падаў скаргу, у якой указаў, што з Беларусі ён выехаў на час вучобы і мяняць месца жыхарства не мае намеру.
Уладзіслаў вучыцца ў Варшаўскім універсітэце на факультэце паліталогіі і міжнародных адносін па спецыяльнасці «эксперт па Еўразвязу». Хлопцу засталося вучыцца адзін год. У гутарцы з tut.by ён падкрэсліў, што ўдзел у парламенцкіх выбарах для яго — не студэнцкі праект, і, калі б стаў дэпутатам, то ўвесь свой час прысвяціў бы грамадскай дзейнасці ў Беларусі
— Вядома, можна было б напісаць і дыплом аб гэтым, але не. Для мяне гэта свядомы крок, да якога я доўга рыхтаваўся, — распавёў Уладзіслаў Сыса.
Вылучацца ад БСДГ хлопец вырашыў, бо баяўся, што сабраныя подпісы «забракуюць» на этапе рэгістрацыі кандыдатам:
— Вырашыў перастрахавацца і пайсці ад партыі.
Скаргу Уладзіслава Сысы Брэсцкі абласны суд разгледзіць 24 кастрычніка.