Пампеа заявіў, што Трамп гатовы да ваенных дзеянняў супраць Турцыі
Прэзідэнт ЗША Дональд Трамп гатовы ўжыць ваенную сілу супраць Турцыі «ў выпадку неабходнасці», заявіў у інтэрв'ю CNBC дзяржсакратар Майк Пампеа, піша rbc.ru.
«Мы аддаем перавагу міру. Але ў выпадку падзей, пры якіх спатрэбяцца ваенныя дзеянні, <…> прэзідэнт Трамп цалкам гатовы іх распачаць», — сказаў ён.
Пры гэтым Пампеа адмовіўся канкрэтна сказаць, якія менавіта дзеянні Анкары прывядуць да вайсковага адказу з боку ЗША. Ён растлумачыў, што не хоча перашкаджаць «прэзідэнцкаму рашэнню аб тым, ці ўзяць на сябе грандыёзнае абавязацельства выкарыстоўваць амерыканскую ваенную моц».
9 кастрычніка Турцыя пачала ваенную аперацыю «Крыніца міру» супраць курдскіх сіл на паўночным усходзе Сірыі, якіх лічыць тэрарыстамі. ЗША — саюзнікі курдаў — пачалі вывад сваіх войскаў з рэгіёну, аднак асудзілі дзеянні Анкары і ўвялі супраць яе эканамічныя санкцыі. Супраць правядзення аперацыі таксама выступілі краіны ЕС.
