У Мазыры міліцыя прыехала на выклік — і моцна здзівілася ФОТА
Увечары 17 кастрычніка ў Мазырcкі РАУС звярнулася жанчына. Яна паведаміла пра канфлікт са сваім сужыцелем у кватэры па бульвары Юнацтва, паведамляе абласная міліцыя.
Па прыбыцці на месца здарэння супрацоўнікаў міліцыі чакаў незвычайны сюрпрыз. На сцяне вісела карціна, зробленая з частак зброі.
Як патлумачыў 43-гадовы мужчына, каля 10 гадоў таму ён выкапаў арсенал на прысядзібным участку, што каля станцыі Галявіцы Калінкавіцкага раёна. З затвора вінтоўкі, штыка, часткі ўдарна-спускавога механізму (як мяркуецца, ад вінтоўкі Мосіна), ствала вінтоўкі і ручной гранаты Ф-1 з запалам ён і зрабіў сабе своеасаблівы твор мастацтва і павесіў на сцяну. Для гэтага нават адпілаваў частку гранаты, каб было зручней мацаваць.
У кватэры таксама былі выяўленыя каска часоў Вялікай Айчыннай вайны, патроны і гільза.
Усе боепрыпасы канфіскаваны для правядзення экспертызы. Мазырскім РАУС па гэтым факце праводзіцца праверка.
