Жыхарцы Маладзечна так хацелася на бальнічны, што яна парэзала сябе
У міліцыю звярнулася 25-гадовая дзяўчына, яна паведаміла, што невядомы мужчына выкраў сумку з кашальком, у якім было 50 рублёў, і парэзаў ёй рукі, паведамляе абласная міліцыя.
Інцыдэнт, маўляў, адбыўся вечарам у парку Перамогі. Аднак у міліцыю дзяўчына звярнулася праз гадзіну, вярнуўшыся дадому.
Па адрасе выехалі міліцыянты. Аднак, апытаўшы «пацярпелую», яны выявілі шмат нестыковак.
Урэшце дзяўчына прызналася, што паведамленне аб нападзе непраўдзівае і яна такім чынам спрабавала патрапіць у бальніцу.
Супрацоўнікі крымінальнага вышуку ўстанавілі, што парэзы на руках дзяўчына нанесла сабе сама.
Для гэтага яна ўзяла кухонны нож у суседа, бо свой быў тупым.
Брыгада хуткай дапамогі даставіла яе ў прыёмнае аддзяленне, але пасля агляду спецыяліста пацыентку адпусцілі дадому. Тады ёй і прыйшла ў галаву думка паведаміць у міліцыю аб разбойным нападзе.
Па дадзеным факце праводзіцца праверка. У дзеяннях заяўніцы праваахоўнікі ўгледжваюць прыкметы складу злачынства, прадугледжанага артыкулам 400. За загадзя ілжывы данос ёй пагражае да пяці гадоў пазбаўлення волі.