Былы прэс-сакратар Лукашэнкі паедзе генконсулам у Гуанчжоу
Аляксандр Лукашэнка 15 кастрычніка, прымаючы кадравыя рашэнні, прызначыў Андрэя Папова генеральным консулам Беларусі ў Гуанчжоу (Кітай).
Андрэй Папоў. Фота БелТА.
Папоў — ураджэнец Брэста, вучыўся ў Лінгвістычным універсітэце. У 2006 — 2010 гадах Андрэй Папоў быў прэс-сакратаром МЗС. У 2010 годзе накіраваўся на працу намеснікам пастаяннага прадстаўніка Беларусі пры ААН і іншых міжнародных арганізацыях у Жэневе.
У 2014 годзе Андрэй Папоў узначаліў прэс-службу кіраўніка Беларусі. Нейкі час працаваў паралельна з прэс-сакратаркай Аляксандра Лукашэнкі Наталляй Эйсмант. Аднак у 2016 сышоў у МЗС на сціплую пасаду старэйшага дарадцы ўпраўлення Азіі, Аўстраліі і Акіяніі.
Консульства Беларусі ў Гуанчжоу адкрылася 8 лістапада 2018 года. На адкрыцці прысутнічаў намеснік міністра замежных спраў Беларусі Андрэй Дапкюнас.