Камуністы-лукашэнкаўцы працягваюць адмаўляць Курапаты
7 кастрычніка ў Цэнтральным камітэце Кампартыі Беларусі пры ўдзеле другога сакратара ЦК Георгія Атаманава была прэзентаваная кніга Аляксандра Плавінскага «Курапаты — ля вытокаў гістарычнай сенсацыі».
Гэтая кніга даказвае, што ў Курапатах расстрэльвалі не ў 1937—1941 гадах, а ў перыяд нямецкай акупацыі з 1941 па 1944 гады. Гіпотэзы, выказаныя ў кнізе, пярэчаць высновам следстваў, праведзеных беларускай пракуратурай і вайсковай пракуратурай у 1980-я, 1990-я і 2000-я гады. Яны выявілі, што ў Курапатах пахаваныя дзясяткі тысяч ахвяр сталінізму.
Кампартыя Беларусі, у адрозненне ад Партыі левых «Справядлівы свет», падтрымлівае Аляксандра Лукашэнку і ўзамен мае рознага роду прывілеі, дэлегуе дэпутатаў у Палату прадстаўнікоў і саветы рознага ўзроўню.