На ўзбраенне беларускай арміі можа паступіць мадэрнізаваны «Ураган»
Сёння на палігоне Асіповіцкі прайшлі паспяховыя выпрабаванні баявымі пускамі мадэрнізаванай рэактыўнай сістэмы залпавага агню (РСЗА) «Ураган». РСЗА прайшла паглыбленую мадэрнізацыю на прадпрыемствах Дзяржаўнага прамысловага ваеннага комплексу. Пускі прайшлі паспяхова, снарады з высокай дакладнасцю збілі цэлі, паведамляе Мінабароны ў сваім тэлеграм-канале.
Мадэрнізаваны «Ураган» атрымаў палепшаныя тактыка-тэхнічныя характарыстыкі: новыя шасі, сучасныя сродкі навігацыі, сувязі, перадачы даных, пазіцыянаванне ды іншае.
Выпрабаванні пракаментаваў начальнік ракетных войскаў і артылерыі Узброеных сіл генерал-маёр Генадзь Казлоўскі.
«Вынік мадэрнізацыі баявой машыны апраўдаў чаканні. Мадэрнізаваны «Ураган» атрымаўся прымальным для нашых войскаў. Дзякуючы новым шасі ён мае палепшаную праходнасць, больш зручны ў абслугоўванні. Перавод з паходнага становішча ў баявое ажыццяўляецца хутчэй, чым у немадэрнізаванай версіі гэтай РСЗА. Гэта былі толькі папярэднія выпрабаванні. Яшчэ будзем удасканальваць некаторыя моманты. У хуткім часе пройдуць і дзяржаўныя выпрабаванні. Ужо пасля гэтага будзе вырашацца пытанне аб пастаноўцы баявых машын у нашы Узброеныя сілы», — сказаў Казлоўскі.