Камісар Хан патлумачыў, чаму не адбыўся візіт Магерыні ў Мінск
flickr.com
Адмена візіту ў Мінск вярхоўнага прадстаўніка Еўрасаюза па замежных справах і палітыцы бяспекі Федэрыкі Магерыні ніяк не паўплывае на сяброўскія адносіны Беларусі і ЕС. Пра гэта ў інтэрв'ю тэлеканалу АНТ заявіў член Еўракамісіі па пытаннях пашырэння і палітыкі добрасуседства Ёханэс Хан, піша Tut.by
- На жаль, візіт не адбыўся, таму што прэзідэнт Беларусі (4 кастрычніка Аляксандр Лукашэнка знаходзіўся ў Жытоміры на Другім форуме рэгіёнаў Беларусі і Украіны) таксама знаходзіўся не ў краіне, — распавёў Ёханэс Хан.
Ён яшчэ раз падкрэсліў, што не было ніякіх сур'ёзных прычынаў для адмены візіту, «проста фізічна яго немагчыма было здзейсніць».
— У любым выпадку гэта [адмена візіту] ніяк не паўплывае на сяброўскія адносіны Беларусі і Еўрапейскага саюза, і я спадзяюся, што ў іх нават з'явіцца станоўчая дынаміка ў найбліжэйшы час, - дадаў Хан.
Пры гэтым ён адзначыў, што спадзяецца, што візавае пагадненне будзе падпісана, як і пагадненне аб прыярытэтах партнёрства паміж ЕС і Беларуссю.