Два заўзятары мінскага «Дынама» адмовіліся ціснуць руку цемнаскураму гульцу каманды папулярных блогераў «Амкал»
Фота Дар'і Буракінай
Матч заўзятараў мінскага «Дынама» супраць папулярнай каманды блогераў «Амкал» 28 верасня адзначыўся не толькі сабраным за 15 хвілінаў аншлагам, але і расісцкімі выхадкамі двух гульцоў беларускай каманды, піша Tut.by.
На перадматчавым поціску рук два гульцы «Дынама» (на майках былі надпісы «Буквар» і «Міхалыч») адмовіліся ціснуць руку цемнаскураму гульцу «Амкала» Джэфу Бабатумбе. Адзін з іх таксама не працягнуў руку суперніку, у якога валасы былі афарбаваныя ў чырвоны колер (Sanya FIFA).
Пасля гэтага выпадку заснавальнік каманды «Амкал» Герман El Classico выпусціў ролік, у якім распавёў, што незадоўга да выезду адзін з карыстальнікаў даслаў ім паведамленне, папярэджваючы пра запланаваныя расісцкія акцыі з боку заўзятараў «Дынама». Герман таксама выклаў ролік аб размове з адным з фанатаў мінскага клуба, які заявіў, што перад выездам «трэба прабіваць глебу», а таксама сказаў, што заўзятары «Дынама» мелі права не ціснуць руку цемнаскураму футбалісту.
Герман пры гэтым адзначыў, што ў «Амкала» няма ніякіх прэтэнзій да самога клуба «Дынама-Мінск» і дадаў, што яго прадстаўнікі добра сустрэлі блогераў і прынеслі пасля матча прабачэнні за паводзіны сваіх заўзятараў.
